Feminismu pa paisanos

Va unos díes espublizaba una nueva entrada nel so blogue un bon amigu sobre la necesidá de xenerar discursu feminista por y pa paisanos. Evidentemente lo que se fai dende El Paporrubio ye rellanzar una idea yá existente, nun inventamos nada nuevo, pero cuido que yera, efeutivamente, preciso volver sobre’l tema porque tal paez que lo escaecimos. Prestábame agora poner el mio granín d’arena nesti alderique.

De mano, cuido, que precisamos volver poner enriba la mesa dos coses que non por básiques tenemos siempres presentes o clares. Estes dos idees son: el feminismu ye un discursu filosóficu que defende la igualdá ente les persones denunciando en concreto la discriminación por motivu de xéneru; y, vivimos nuna sociedá machista, ello ye, que desicrimina por razón de xéneru a toles persones que nun entren na categoría de «paisanu».

Vaya dos coses fuisti descubrir podéis pensar. Non, nun toi descrubriendo absolutamente nada nuevo, ye verdá, pero como digo más enriba tal paez que perdiemos de vista estes dos coses tan básiques. Y digo que paez que lo escaecimos porque nun actuamos en consecuencia.

Nun actuamos en consecuencia cuando escaecemos que vivir nuna sociedá machista trai arreyao que los paisanos teamos asitianos nuna situación de poder en rellación a les muyeres. Nuna situación de discriminación, seya de la triba que seya, dase una anormalidá nes rellaciones de les coleutivos implicaos. Pero nun ye que’l coleutivu discrimináu tea nuna situación d’anormalidá y heba que lu facer normal asitiándolu nel llau del otru coleutivu. L’anormalidá ta nos dos llaos, porque hai una rellación d’interdependencia, ello ye, el coleutivu non discrimináu ye amás un coleutivu privilexáu.

Cuéntovos esto otra vuelta con una metáfora. Vamos maxinar que la sociedá ta nun podium con trés escalones onde tenemos un escalón A, el cimeru, un escalón B, el mediu, y un escalón C, el fonderu. Toi cuasi seguru que toos vamos coincidir en que les muyeres nuna sociedá machista tán nel escalón C. La cuestión ye, ¿tenemos igual de claro en qué escalón tamos los paisanos? Personalmente cuido que non siempres.

El discursu mayoritariu, y non solo ente los paisanos, ye que la praxis feminista ye da-y fuelgu a la muyer y empobinala pa que xuba escalones, pa que dexe de tar nel fonderu. Si lo dexamos equí ye, precisamente, escaecer en cuálu tamos los paisanos. Esta idea lleva a una mala praxis feminista cargando de responsabilidá a les muyeres, lleva al inmovilismu real de los paisanos y, nos casos más sangrinos, lleva a echa-y en cara a les muyeres la so supuesta incapacidá de llegar a onde tán los paisanos.

Efeutivamente les muyeres nunca nun van poder llegar como coleutivu humanu a asitiase onde tamos los paisanos actualmente. El motivu nun ye que valgan menos, el motivu real ye que precísase un coleutivu marxináu pa qu’exista un coleutivu privilexáu. El feminismu aspira a la igualdá de xéneru, ello ye, a la normalidá, a destruyir la rellación que fai qu’heba un coleutivu privilexáu y otru marxináu, non solo a que desapaeza lo marxinao.

Siguiendo cola metáfora’l podium, hemos tener claro que los paisanos tenemos la obligación de ser parte activa del feminismu porque tamién nós mos tenemos que mover: hemos baxar esi escalón. Cuando formes parte d’un coleutivu privilexáu ye difícil ver que coses que pensamos normales son en realidá privilexos y sonlo porque pa qu’eso normal se dea tien d’existir un coleutivu marxináu.

Nun se trata de fustigamos nin públicamente nin en priváu por ser paisanos y vivir nuna sociedá machista. Nós nun pidimos esta situación como tampoco la pidieren les muyeres. La nuesa responsabilidá ta n’asumir ensin complexos nin tabúes les cares de la moneda: hemos empoderar la muyer pero pa qu’esi empoderamientu seya real y efeutivu los paisanos hemos desempoderanos. Elles han xubir al escalón B, nós hemos baxar al escalón B. Como diría Aristóteles: la virtú ta nel puntu mediu.

Hemos movemos toos, los dos coleutivu, contra una categoría que, siendo tamién básica, munches de veces escaecemos. Hemos reivindicar la categoría persona o ser humanu y asitiala en centru del discursu filosóficu y políticu qu’ha rexir la nueva sociedá que queremos llevantar. Hemos dexar d’existir como paisanos y como muyeres en tanto que categoríes sociales y reinterpretales como lo que son, socategoríes de la categoría básica.

Evidentemente estes dos socategoríes de persona nun abonden pa desplicar la complexa identidá humana tanto personal como grupal. Hemos asitiar tamién a la par d’elles toles demás socategoríes que mos identifiquen: condición sexual, raza, nacionalidá, comunidá idiomática… etc nun siendo nenguna d’elles escluyente nin estática.

Namás asina vamos poder dexar de vivir nuna sociedá onde mos dixebremos ente privilexaos y discriminaos: siendo, primero de nada, persones.

Advertisements