¿POR QUÉ NACIONALISTA, POR QUÉ D’IZQUIERDES?

Hai bien poco vi la película ‘La pelota vasca, la piel contra la piedra.’ y féxome replantegame munches coses. Les más d’elles sobro’l denomáu conflictu vascu, pero tamién fixo que rexurdieren y tronaren na mio tiesta les dos entrugues que-y dan títulu a esta entrada. He de dicir que yá tenía en mente facer esta entrada y que yá tenía escrito alredor de cuatro o cinco párrafos sobro’l tema. Esborriélos y emprimé de nuevo.

Pa min, ye enforma complicao estremar ente dambes entrugues una arrespuende a la otra y al aviesu (anque seya lo contrario pa muncha xente). Dende que teo conciencia nun remembro momentu dalu nel que nun m’asitiare a la esquierda y embaxo una idea nacionalista. Y digo conciencia solo y non conciencia política, porque siempres sentí míos discursos que dempués pasaren a llamase nacionalismu d’esquieres o esquierda nacionalista.

 

 

A los catorce años españó na mio mente una conciencia política. Ansia por saber qué pasaba, quién gobernaba, por qué lo facía y, sobre manera, cómo gobernaba. Na mio casa (entendíu’l sentíu de casa nun sen ampliu, familia, collacios, xente allegao a la familia) siempres sentí coses de tou tipu. Los mios pas son simpatizantes del PSOE, lo que me llevó a un interés por esta fuercia política que bien rápido me defraudó. ¿Yera eso esquierdes? Non.

El segundu pasu foi IU: una fuercia que se declaraba d’esquierdes, republicana, internacionalista y que n’Asturies amás dicíase asturianista. Tenía bona pinta l’asuntu. Pero la realidá cayóme como una zapica d’agua xelao: aplaudía al rei español, ¿ú entós el republicanismu? ¿qué internacionalimu emplegaba? Bien ceo pudi ver que yera la etiqueta d’«esquierdes» del PSOE. Pero, había d’algo d’esperanza, un añu más pudi ver como foren a la manifestación del Día de les Lletres Asturianes. Polo menos paecía que defendíen la oficialidá de la llingua asturiana.

IU tampoco cumplía colos mios plantegamientos políticos na praxis. Poro dediquéme a dir a la gueta de los partíos que defendieren la oficialidá de la llingua asturiana. Topéme trés: Partíu Asturianista, Andecha Astur y Izquierda Asturiana. Fui mirando qué discursu tenía caún y apaeció’l terminu ‘nación’ y ‘nacionalismu’. Medré nuna familia simpatizante y votante del PSOE poro aquellos términos diéronme perceguera nun primer momentu. ¿Nacionalismu n’Asturies? ¿Yera eso posible? ¿Yera coherente? Amás de la llingua hai otres coses. Conciencia, hestoria, drechos coleutivos, medioambiente, cultura… Coses nes que nunca reparé de xeitu consciente.

 

 

Cunta la lleenda que se fixo sobre Sabino Arana que pasó de ser carlista~fuerista, al pá del nacionalismu vascu, dempués de falar con un lliberal que-y dixo: «Con tanto defender los fueros vascos tas pidiendo un tratu desigual pa vós, que tengáis privilexos que’l restu nun tienen y eso nun ye ser bon español». Entós Arana entrugóse a sigo: ¿fueros o Nueva Planta? ¿Bizkaia o España? Y la rempuesta foi: «si teo que dexar de ser como soi, arrenegar de la mio cultura y dexar de falar la mio llingua llariega pa ser español, entós nun soi, nin sedré, español».

Nun sé si sedrá verdá, o si esi foi’l plantegamientu qu’él se fixo na realidá; pero pa min ye una hestoria totalmente creyible. Y yelo, porque a min pasóme lo mesmo. Realmente yera custión léxica. Asturies casaba perfeutamente cola definición de la pallabra «nación», poro Asturies ye nación. España pasó entós a ser un estáu, un conxuntu de muérganos de gobiernu.

 

 

Nun ye antiespañolismu irracional, pero ye que, de magar entamó l’alderique sobre si Asturies yera España o qué yera namio mente, llevé munchos güelpes con esi tema que me fixeron decantame pol llau de la refuga d’España. ¿Porqué español o llingua española? ¿Nun ye tan español l’asturianu o’l gallegu o cualesquier otra llingua del estáu como’l castellán? «Non» Esa foi la fría y dura contestación.

Y ye que si se mira la hestoria d’España, vése bien fácil qu’esti ye un estáu integrador y absorvedor. L’enfotu ye conquistar y ‘españolizar’ lo conquistao, enxamás se permite disidencia, cambéu o retruque dalu. Uniformización ye la máxima imperial. Nun ye noxu al restu de persones del estáu o a los que se sienten españoles. Pero ye que vese bien que la empresa imperial (sí EMPRESA con toles lletres) que suañaron los Reis Católicos nun cuayó del too y amosó enforma bien ser dalgo escoso anguaño.

Les élites político–económiques que faen vidable España nun foron quien a esborriar, como bien quixeren, les otres realidaes. El proyeutu nun furruló como ellos queríen y los ‘priféricos’ (o non tan periféricos) tampoco foren quien a facer dalgo estremao a ello, a xuntar n’harmonía y igualdá a tolos pueblos. Nun hai qu’escaecer que Portugal foi un de los territorios que tuvo embaxo’l dominiu español y enxamás miagó tornar al proyeutu. Tampoco hai qu’escaecer que l’imperiu yera, y ye, peninsular y continental. Por ello inda güei esisten movimientos pa recuperar territorio nacional. Por exemplu’l: Movimiento por la Reincorporación de Cuba a España como Comunidad Autónoma, por toos ye conocida tamién la vindicación ‘hestórica’ de Gibraltar, el ‘Marruecos español’… etc.

 

 

    Ser nacionalista ye anteponer los oxetivos y beneficios de la nación a los propios, y la nación nun ye un simple territoriu, la Nación Asturiana ye’l conxuntu d’asturianos y asturianes y los intereses d’esta son los intereses de la so ciudadanía. Por ello, solo siendo d’esquierdes, pémeque, pues ser realmente nacionalista. Cola llingua, la cultura, la tradición y la hestoria van el puestu de trabayu, unes codiciones dignes pa desempeñalu, la educación, la igualdá llegal, el desaniciu de les inxusticies económiques y un llongu etcétera; resumíu en defender una Asturies con una ciudadanía llibre en tolos ámbitos y aspeutos de la vida.

    Por ello, la llucha ye concienciar al Pueblu Asturianu de que s’axunte nuna cadarma qu’entame dende embaxo, con una democracia participativa fecha por y dende la xente. Una Asturies que seya quien a mirar con arguyu de la so esistencia propia al mundiu, que s’autorepresente perdayuri y que se solidarice colos otros pueblos que tán tamién na mesma llucha. De nada nun sirve que’l que marafundia y esplota al pueblu fale n’asturianu o diga facelo por Asturies, porque sigue marafundiando y esplotando.

 

 

   Esto ye’l nacionalismu d’esquierdes y por ello soi nacionalistes d’esquierdes.

Advertisements