DÍA INTERNACIONAL DEL DESANICIU DE LA VIOLENCIA ESCONTRA LA MUYER

Apúrrovos el manifiestu fechu y lleíu por min nel mio institutu pol motivu del festexu del Día Internacional del Desaniciu de la Violencia Escontra la Muyer. Ye’l primer testu na llingua de nueso que se llee nesti centru, y un claru pasu más na normalización del so emplegu na institución educativa.

DÍA INTERNACIONAL DEL DESANICIU DE LA VIOLENCIA ESCONTRA LA MUYER


Güei, 27 Payares, celebramos equí’l Día Internacional del Desaniciu de la Violencia Escontra la Muyer, un día de festexu por tolos pasos daos p’alantre nel caleyar haza la igualdá de los sexos, pero al empar, ye tamién un día de vindicación y llucha por tolo que mos queda por facer y por tolos llogros que mos queden por algamar.


Quixere dar les gracies a toles persones que fixeren posible que nesti actu oficial del nuesu institutu se puea tar lleendo un testu na llingua’l país, un claru pasu más de normalización. Pero güei nun ye un día pa esta xusta reivindicación, eso facémoslo los asturfalantes tolos díes; güei ye día d’una reivindicación entá más importante, la igualdá ente les persones.


A lo llongo de la hestoria, per aciu de la Ilesia y la relixón, impunxérense los valores d’una sociedá patriarcal, incluso en llugares de tradición matriarcal, con una cadarma social enforma más igualitaria, como l’asturiana. Asina, foron esborriaos los nomes de muyeres perimportantes nes destremaes dómines hestóriques, arrequexaes nuna figura combayona a la figura del patriarca.

Dende Safo de Lesbos y Hipatía fasta Rosa Luxemburg, Dolores Ibarruri o Simone de Beauvoir hebo milenta muyeres que condicionaren pa bien el presente que nós vivimos. Rosalía de Castro, Marian Pineda, Nerfertiti, Florence Nightingale, Princesa Fizee, Frida Khallo, Indina Gandhi o Anglea Davis son una riestra de nomes de munches d’elles, murniamente desconocíes por cuasi toos de nós. Reines, escritores, filósofes, matemátiques… etc. Figures femenines que nun mos son tolo familiares que debieren.

 

Aínda aguaño tenemos esta situación nel nuesu mundiu. Nin Estaos, nin políticos defenden daveres la igualdá ente homes y muyeres. Eso nun ye dicir “los y les” nos discursos, o nos documentos oficiales. Defender los drechos de les muyeres ve mirar el porqué elles cobren menos nos sos tayos pol desencolcu del mesmu trabayu. Ye mirar por qué se sigue arrequexando socialmente a la muyer. O por qué, con gran murnia na coral, tenemos que facer una llista tolos años cola riesta de nomes de muyeres asesinaes polos sos maríos.


Pa esborrar esta llaceria sociocultural que carecemos entovía, hai de mirar pa les razones qu’aiden qu’anguaño teamos esta gafa situación ente nós. Tenemos de presta-y atención a lo que desplica por qué esos homes son quien a matar a la so muyer pol aquel de creyer que ye suya, y que puen facer con ella lo que-yos pete. Tenemos qu’educar na igualdá a la mocedá, y dir camudando vezos y zunes sociales tan enraigonaes como llacerioses.


Los gobiernos tienen qu’afondar nes causes que despliquen esto, y tentar camudalo. Dexar de tratalo como daqué aneudóticu o esporádico; y velo como lo que ye, un problema social de fondu. VIOLENCIA, pura y dura; con toles lletres y con tola carga ñegativa que trai arreyao darréu.


Les lleis en defensa de la igualdá sexual tán bien, la discriminación positiva ye abondo necesaria pa saldar esa situación marxinal na que se-yos obligó a tar a toles muyeres; pero, nun ye lo único. El papel ye forníu, y puxa por tolo que se-y eche; pero les pallabres han camudase a aiciones o nun se camudará un vierbu. L’emplegu d’entrambos sexos (el/la, los/les) nos discursos o nos documentos nun quier dicir nada. Los mesmos que lo empleguen glayando pola igualdá, son los mesmos que llueu repiten cadarmes patriarcales.

Primero critiquen les aiciones d’unos, y llueu afalaguen les aiciones que van a la contra de la llibertá d’aición de la muyer. El drechu a dedicir sobro’l so cuerpu, si quier tener un fíu o albortar, ye daqué que-yos fraya tantu los esquemes de la so realidá que nun son quien nin a siguir mintiendo. Caise-yos la mázcara en cuantes s’albidra la idega de poder decidir y escapar al so control patriarcal.


Anguaño ye pernecesario camudar los esquemes de lo masculino y lo femenino. Tenemos de tresformar lo qu’hai y d’intentar facer y ufiertar una sociedá más xusta, igualitaria y que desanicie perdafechu la violencia en toles sos formes. Una sociedá llibre, na qu’homes y muyeres vivan llibres, n’igualdá de condiciones, colos mesmos drechos y les mesmes obligaciones; una sociedá sofitao nos pilpayos del respetu, la convivenvia y la tolerancia ente toos.

Advertisements

2 thoughts on “DÍA INTERNACIONAL DEL DESANICIU DE LA VIOLENCIA ESCONTRA LA MUYER

  1. Los tos artículos son perinteresantes, Pelayo, y amuesen un xacíu poco común ente la xente y, sobre too, entre la mocedá. Lo curioso ye la cantidá d’entraes que de vezu tienes nos comentarios que falen de llingua o xuntanza, mentantu que nesti, yá antiguu, que fala de drechos d’igualdá entre homes y muyeres nun s’amuesa el mínimu interés. Ye lo de siempre: un país de paisanos onde se xunten los paisanos pa facer y desfacer xuntures y xuntances en vez de tar nel chigre. Nel fondu, les muyeres del “asturianismu” siguen en casa cola pata quebrada o respiren n’otros mundos d’aire más llimpio, de cuerpos y espíritus más llibres, fuera d’esti tufazu a rancio y esta ceguera mental que ta afogando dende va tiempu a esti país.

  2. Gacies por lleeme Anina, agora mesmo nun teo munchu tiempu pa facer entraes más a menudu, pero bono.
    Sobro lo que dices, bien ye verdá que falta la presencia de la muyer nel asturianismu. Realmente nun sé por qué sedrá… probablemente resultáu d’esta sociedá na que s’impunxo’l machismu y el patriarcáu, y por esi calter tán ensimismáu que tien l’asturianismu, que emprimó con homes y siguió mayoritariamente siendo namás cosa d’homes. Una gran pena.
    Per otru llau, esti artículu nun ye de los que más arguyusu tea. Fícilu por encargu pa esi día. Ye totalmente tópico lo que digo nél y dafechu cómpliz del sistema qu’agora quier, hipócritamente llavar la conciencia faciendo coses como estes.
    Un saludu y gracies, otra vuelta, por lleeme.

Dexa un retruque

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s