Desesperación

Llevanteme otru día más, col pelo alborotáu, y la cara fatu d’entá dormíu. Dempués d’almorzar coles pa clas. Mientres, fui pensando na fin de selmana: nada; nun fici nada; dir a clas de gaita, salir a xintar colos pas y unos collacios d’ellos, ver la televisión, echa-y una güeyada a los sitios habituales d’interné, falar pol msn… Nada interesante.

Vas caminando. Atopes xente pela cai. Xente que tamién va pa escuela, porque ye llunes y too emprima de nuevu, otra selmana que se presenta ensin cambeos. Llegues a l’aula. Ehí yá ties a compañeros. Xente más madrugador que tu. ¿Llevantéme más tarde?¿Caminare más sele güei? Qué más dará…

Empecipien les clases. Lengua, la tan afamada y querida llingua común. Clas interminable pola mor d’una lliteratura más desplicada, un sueñu descomanáu, una galbana cafiante; una hora aburrida, cansina y repetitiva. Finó a la fin yá finó Lengua.

Filosofía, otra asignatura mal enfocada. Munchu que lleer, munchu que ver nun testu ensin desplicar. Munchu que custionar ensin saber. Nun pensamos, mos dan los atalatamientos yá mazcaos. Despliquen daqué pa que sepiamos contestar nun esame.

Hestoria, Revolución Rusa d’Ochobre, Lenin, Stalin, Troski. Lliberación del opresor, llibertá, xusticia, faternidá ya igualdá. Coses bones d’aquella qu’agora yá tenemos, que nun hai de custionar. Nun poner en dulda les nueses llibertaes. Coses que foren bones y lóxiques na hestoria, agora tornáronse alloriaes, estremistes y “radicales”.

Recréu, quince llargos y escasos minutos pa “folgar” y desconeutar, si dala vegada coneutasti.

Griegu. Una clas entretenida: analices, declines, copies, tornes y deprendes. Un idioma muertu, pero qu’influyó enforma al míu, y tamién al castellán. Entretenida ya interesante sedría’l resume d’esta materia.

Tutoría, nuevamente col profesor de filosofía, Secretariu del Centru. Falamos d’un problema qu’hebo nel colexu, y elli tenta llavase les manes y nun facer nada, nin responder énte nós. Quier que deprendamos que los confictos nun son malos. Sinón que según se resuelvan puen ser malos o enriquecedores. Espétate na cara que, por exemplu, “Pelayo está, o eso creo yo de acuerdo con la cooficialidad del asturiano o del bable y yo preferiría que no lo fuese, pero por eso no tenemos que llevarmos mal”. Diz cosa tala, delantre d’una clas, onde tou dios gacha la tiesta ensin retrucar un res, u lo ven normal ya lóxico; fai esa afirmación ensin cortarse un pelo, y ensin entrugame si a min me cayía bien o mal pa llueu dicir si mos podíemos llevar bien o non.

E. Física, correr; dando vueltes a un pista.

Un día apasionante. Nun centru d’educación secundaria estupendu. Onde siguen a rajatabal esi principiu de la eduación ESPAÑOLA, d’uniformización, adoctrinamientu y emprobecimientu de la cultura. Desanicien tolos pensamientos de los escolinos. Arrequexen la nuesa llingua. Faenmos robós pal día de mañana, pa trabayar como mules por un míseru sueldu, pa que teamos de colar d’equí pa poder ganar el pan, pa que nun llevantémos la voz a los que mos gobiernen, pa qu’escaezamos la nuesa cultura ya identidá. Pa que mos combirtamos n’oveyes; que van al pastor (Estáu, Ilesia, Empreses Multinacionales, Sindicatos averaos al Estáu y Bancos).

Recapacites un minutín. Dan ganes de llorar, de berrar como cuando yere un bebé. Desesperación resona na tiesta. Quies camudar, nun ser como los demás. Pero eso cuesta muncho facelo. Como’l protagonista d’una novela dicía nun monólogu: “No pensar. No pensar. No pensar.”; y como dixo un collaciu, necesito un abrazu. Una siemple muestra de comprensión, d’amor, d’amistá o de llástima.

Advertisements

Queríos Reis Magos

Como trabayu de vacaciones de Nadal la profesora d’ASTURIANU mandómos faer una carta a los Reis Magos, onde punxíeremos los nuesos enfotos y deseyos pa esti añu entrante.

Equí vos dexo la mía:


Queríos Réis Magos:
Esti caberu añu 2008 viví delles coses bones, otres males y dalgunes que nin bien nin mal; pero nun conxuntu creyo que foi un bon añu pa min, anque entá tuvi de lluchar a la escontra d’imposiciones coles que nun toi nada d’alcuerdu. Pienso que fui una bona persona, un bon rapaz. Y les mios males aiciones foron bien poques, dala hebo, claro ta, pero enforma poco. Por ello:

Prestaríame enforma que m’unviareis más fuercia mental pa ser quien a valtar les muries qu’asitia nel camín la galbana y asina consiguir poder sacar alantre esti cursu académicu nel institutu, y pasar a Segundu de Bachilleratu; na escuela d’idiomes, y algamar los conocimientos más básicos y cimeros del alemán; y en gaita, pa poder salir a desfinar. Poder aprobar los esámenes, garrar conocimientu, fer collacios nuevos y caltener los que yá teo. Perder la vergoña a tocar en públicu y facer por ensayar más pa tocar bien nos pasacais. Nel marcu amorosu… dexémoslo en manes de la suerte, del destín o de les circuntancies, a les qu’espero tar a la altura pa salir bienparáu. Pa min namái, y ehí ye nada, vos pido eso.

El restu de los mios suaños, enfotos, pidimientos y deseyos son toos p’Asturies; p’ameyorar la situación d’esti país tan escaecíu na hestoria más recién y que la sociedá asturiano, en conxuntu, como pueblu, como fexo durante tola hestoria, puea sacar esta tierra de la llamuerga na que ta dende hai bien d’años.

Pa entamar, que la FSA—PSOE y el PP d’Asturies entren en razón y nun mos sigan torgando la oficialidá político, alministrativo y llegalmente de la nuesa llingua llariega, dotándola del estatus xurídicu que-y correspuende. Que nun desapaeza, que les nueves xeneraciónes la sientan na cai; sepian falala, escribila y lleela; que puean amplegala y vivir nella llibremente. Que se convierta na llingua de la enseñanza y tea un bon futuru en tol dominiu llingüísticu astur. Que la normativización, normalización, usu y promoción de la llingua’l país seya en tol país (Asturies, Llión, Cantabria y Zamora). Que la xunión, anque sólo sía na estaya llingüística, de bonos resultaos y seya una bona aunión.

Llueu, naguo porque’l combayamientu d’IX—Bloque por Asturies—LV amenorgue o desapaeza, pa que’l nuesu autogobiernu vaiga medrando. Que’l drechu al autudetermín que tenemos como pueblu lu podamos esfrutar llibremente y xorreza en non munchos años. Prestaríame munchísimo que la nuesa economía espoxigare, y los cientos de miles de mozos asturianos que tienen de colar de la nuesa tierra nun lo tea que faer; que tolos que colaron puean tornar a la patria, y que salgamos trunfantes una vegada más d’esta llaceriosa situación económico na que tamos por culpa del capitalismu más xabaz.

Toes estes coses nun son posibles nun añu, anque una sí; pero poco a poco, pasín a pasu; sedremos quién, toos xuncíos nuna mesma voz, a dir algamándolo, a dir atropando llibertaes. Naguo porque esta carta vos llegue y mos faigas llegar la fuercia que vos pido, pa min y p’Asturies.

Represión llingüístico nes aules.

Ensayu, o intentu d’ello, fecho por mio y asoleyáu n’ARUELU (http://aruelu.com/spip.php?article302):

“¿Qué yeren los maestros que mos frayaron a insultos, coscorrones, tortazos y palos nos deos, a lo llargo de décades, a los que llegábemos a les escueles falando n´asturianu, que yera la nuesa llingua materna, familiar y ambiental; la única llingua, por tanto, que sabíemos y podíemos falar? ¿Cómo calificar entós, a aquello fieles sirvidores del Estáu español qu´impunxeron el castellán, con violencia física y psíquica, a millones d’inocentes neños (…) asturianos (…) y, mui especialmente na dictadura franquista?”

Carlos Rubiera, Les Noticies, 19 d’Ochobre de 2008, pax. 14

Esta ye una entruga que se fexo C.R. nun ensayu pa Les Noticies y pretaríame afondar dalgo más nesti sen: “la discriminación de los asturfalantes na escuela pública ‘asturiana'”. Dempués de munchu pensar vi qu’a min, un rapaz que ta estudando Primeru de Bachilleratu, también sufrí dicha discriminación. Yo, como los mios pas y otra muncha xente, llevé a la escuela l’asturianu, la única llingua que sabía falar, porque yera la única qu’ellos deprendierome nel llar. Dende qu’entamé la educación Pre-Escolar, enseñáronme a “hablar bien” porque yo dicía “non”, “nun voi dir” o “que mio ma aidame a facer los deberes”; y dempués de munches reñes, munchu puchame y dellos coscorrones dependí daqué perimportante; “Que tea onde tea, si les coses nun les camudamos, siempre van discriminame pola mor de la mio llingua”. Ye más hebo años que cuasi la escaecí.

Pa falar de too esto quixera poner dos espígrafes y facer un dixebra en dos: Clases en Llingua Culta, y Clases en Llingua Estranxera.

Clases en Llingua Culta: Nestes clases ye onde se supón que los asturfalantes vamos a clas de “lengua” y onde mos dan les nociones básiques pa poder escribir y lleer na nuesa llingua. Equí nun tenemos represión dala, como mos podía dicir el nuesu xacíu común.

Clases en Llingua Estranxera: Nesti tipu de clases tan toles materies, ensin incluyir (delles vegaes namás) la llingua de nueso, ya incluyendo otres llingües (castellán, inglés, francés…). Equí nun se mos dexa emplegar la nuesa llingua llariega y ye onde sufrimos la discriminación.

Pa demostrar esto voi poner d’exemplos dos casos que m’asocedieorn a min nel colexu. Yo teo encoyío “Lengua, Cultura y Literatura Asturiana” como asignatura dende siempre y en terceru tenía una profesora cazurra (de Llión, pa evitar confusiones) que tenía como vezu dexar dalgún día dempués de los esames daqué de tiempo libre pa estudiar. Un d’estos díes dexó daqué de tiempo llibre y yo decidí facer unos exercicios pa l’asignatura de “LCyLA” y asina repasaba unes cosines pal esame, que taba cerca. Nesi moentu una collacia entrugome que qué yera lo que dábemos en clas, a lo que la profesora retrucó rápidamente que: “Me parece una gilipollez ir a esas clase y estudiar esa supuesta lengua, vamos yo a mi hijo no lo dejaría ir a eso ni loca”. Y yo como bon asturianu tuvi que retruca-y, y dixi-y, que: “como pa gilipolles yá tas tu, yo voi a clas de lo que qu’a min me dea pola gana”. Cosa a la qu’ella calló. Pero persabío ye por toos que mui pocos callen a estes coses y dalgunos fasta lleguen a les manes pa callar a los que nun mos da la gana d’escaecer la llingua propia.
El segundu casu foi l’añu pasáu, tábemos en clas d’Hestoria y la profesora entrugome que cuantes llingües había n’España (dándo-y bien d’énfasis al pallabru) y yo respondí-y qu'”había una oficial, cuatro co-oficiales y tres ensin co-oficializar”. Ella punxo mal focicu (peror a como lu lleva siempre) y me dixo que cules yeres eses llingües. Yo-y dixi: “El castellano es oficial; el euskera, el català, el aranés y el galego son co-oficiales; y el asturianu, el aragonés y el galego-asturianu TODAVÍA no son oficiales”. Ella toa cínica entrugóme que si yo defendía la oficialidá de la llingua asturiana y yo retruqué-y que si. Entós ella nun ataque d’españolismu ranciu dixo que l’asturianu nun yera una llingua, porque lo dicíen munchos científicos, naide la fala y nun tien escritura dala. La conversación siguió, pero con esto yá pueo amosar la bona actitú de munchos profesionales de la enseñanza faza la oficialidá o la actitú represivo que tiene énte los asturfalantes, por nun dicir l’intentu de dexame en ridículu por defener la mio llingua llariega.

Con esto podemos finar diciendo que los asturfalantes nun sólo se mos reprime cuando falamos n’asturianu, sinón que también cuando dicimos daqué sobro la nuesa llingua o facemos visible’l nuesu apoyu a ésta. Agora m’entrugo yo ¿fasta cuándo tamos dispuestos a siguir aguantando esto?, ¿cuándo vamos dexar de gachar la tiesta y llevantar la voz a la escontra d’esto?, y sobro too, ¿vamos dexar que les nueves xeneraciones pasen polo mesmo?

Por too esto, los más de la sociedá asturiano siguimos saliendo a la cai a glayar al altu la lleva que la nuesa llingua seya oficialidá. Porque enxamás lo escaezamos:

¡NA REFORMA L’ESTATUTU L’ASTURIANU LLINGUA OFICIAL!

Presentación del Blogue

Esti ye’l mio blogue, onde diré apurriendo dellos artículos d’opinión, tanto míos como d’otros; noticies asoleyaes en medios de comunicación asturianos; o cualesquier cosina que me paeza entretenida o interesante.

L’enfotu que fexo que m’animare a escribir estes ringleres y asoleyales na rede foi les ganes que teo de ver la mio llingua al llau de les demás, y esta ye una bona manera de dar a vela pela rede.

Naguo porque vos preste’l blogue.
Munches gracies y ¡Puxa Asturies!